Det er tredje kveld på rad at tyrkarar demonstrer mot arrestasjonen av ordføraren i byen, Ekrem İmamoğlu, den største politiske motstandaren til Tyrkia si president Recep Tayyip Erdogan.

Ifølge nyheitsbyrået AFP er dette dei største gateprotestane i Tyrkia på over ti år.

– Vi er 300.000 menneske, seier Özgür Özel, leiar av Tyrkias største opposisjonsparti CHP, utanfor rådhuset i byen.

Dette talet er ikkje kontrollert av uavhengige kjelder, men bilete og video viser mange menneske på staden. Tidlegare meldte AFP at 10.000 demonstrantar var på veg til staden.

To journalistar skal ha blitt treft i beina

– Erdogan prøver å bruke rettssystemet som eit våpen mot İmamoğlu for å ta over rådhuset. Men vi vil ikkje gi det frå oss til ein statleg innsett leiar, heldt fram Özel.

Opprørspolitiet har skote gummikuler mot demonstrantane og brukt store mengder peparspray, skriv nyheitsbyrået fredag kveld.

To journalistar frå nyheitsbyrået AFP blei treft i beina, melder byrået sjølv.

Styresmaktene gjorde det forbode å demonstrere etter at İmamoğlu, blei arrestert tidleg onsdag morgon.

Likevel er tyrkarar ute i gatene for å vise si misnøye mot arrestasjonen.

– Ver stille no, og det blir deg neste gong, ropte demonstrantane i Istanbul.

Fleire heldt plakatar med tekstar som «Ikkje ver redd, folket er her!» og «Lov, rett, rettferd».

Erdogans utfordrar

İmamoğlu blir sett på som Erdogans viktigaste politiske motstandar.

Ifølge styresmaktene blir han etterforska for å ha hjelpt ein terrororganisasjon, den kurdiske gruppa PKK som er forboden i Tyrkia.

Han blir òg etterforska for korrupsjon.

– Eg nektar tvert for alle skuldingar, svarar han ifølge eit rettsdokument som Reuters har sett fredag.

Partiet hans CHP meiner at Erdogan har arrestert Imamoglu for å hindre han i å bli nominert til partiet sin presidentkandidat før valet i 2028.

Arrestasjonen kom berre dagar før han skulle bli offisielt lansert.

İmamoğlu har vore valt til ordførar to gongar, og blei sist attvalt i 2024.

Han har fleire gongar måtte møte i retten for korrupsjon og ærekrenking, noko han sjølv har nekta for og skulda Erdogan for å bruke domstolane som våpen mot politiske motstandarar.

– Tyrkia vil ikkje gi etter for gateterror, har landets president Tayyip Recep Erdogan uttala.

Han heldt fram:

– La meg vere tydeleg, desse protestane som CHP-leiaren har kalla inn til, er ein blindveg, sa han.

Erdogan har skulda Özel for å opptre uansvarleg og antyda at han òg kan bli straffa rettsleg.

Trass i arrestasjonen seier CHP at dei likevel vil halde nominasjonsvalet søndag og stille Imamoglu som sin kandidat til presidentvalet i 2028

Samstundes som demonstrasjonane går før seg er det tyrkiske aksjemarknaden på det lågaste sidan finanskrisa i 2008, melder nyheitsbyrået Reuters.

Har utvida demonstrasjonsforbodet

Demonstrasjonsforbodet til Erdogan har blitt utvida til å også omfatte hovudstaden Ankara, og storbyen Izmir på vestkysten.

I Izmir er det likevel stordemonstrasjonar fredag, melder opposisjonelle Halk TV. Der har politiet brukt vasskanonar og tåregass for å spreie folkemengda.

Dei siste dagane har det vore demonstrasjonar i minst 29 av Tyrkia sine 81 provinsar, ifølge AFP.

Så langt har 88 demonstrantar blitt arresterte, ifølge tyrkiske medium. Ytterlegare 54 er arresterte for innlegg på sosiale medium som styresmaktene hevdar «hissar til hat».

Innanriksminister Ali Yerlikaya seier at 16 politifolk har blitt skadde sidan demonstrasjonane starta.

Interessert i meir utanriks? Lytt til utanriksredaksjonen si podkast: