Regjeringshæren i Sudan (SAF) seier dei har tatt kontroll over presidentpalasset og fleire regjeringsbygg i hovudstaden Khartoum.
Men kampane i hovudstaden går framleis føre seg.
Fredag angrep den paramilitære gruppa Rapid Support Forces presidentpalasset med dronar, skriv Reuters.
Tre journalistar blei drepen i angrepet, skriv Sudans informasjonsminister Khaled Al-Aiser på X.
Sudanske regjeringssoldatar feirar utanfor presidentpalasset fredag 21. mars.
Foto: Skjermbilde / Bilde fra X– Vi er inne! Vi er inne i palasset, ropar ein mann i militær uniform.
Video og bilete frå sosiale medium viser soldatar frå regjeringshæren feire inne i det krigsherja presidentpalasset.
Fleire videoar viser soldatar som fyrer av våpen rundt palasset.
Vendinga i krigen skjer etter SAF starta ein ny offensiv mot gruppa Rapid Support Forces (RSF) i hovudstaden førre veke.
Det skriv avisa Sudan Tribune.
Det har vore borgarkrig i Sudan sidan 2023. Der kjempar først og fremst to styrkar mot kvarandre:
Dei to styrkane jobba saman i fleire år. Men dei rauk uklar med kvarandre i 2023 på grunn av press om å slå seg saman. Sidan har dei kriga mot kvarandre for å få kontroll over Sudan.
Både regjeringshæren og RSF kontrollerer store ressursar som dei ikkje er villige til å gje opp, blant anna gull.
RSF kontrollerer store delar av Vest-Sudan, blant anna Darfur-regionen. SAF kontrollerer mykje i aust, inkludert mesteparten av hovudstaden Khartoum.
Konflikten blir kalla «verdas største svoltkatastrofe», 24 millionar menneske lid av svolt i landet, ifølgje Leger uten grenser.
Truleg er kring 150.000 menneske er drepne.
Konflikten er komplisert og har røter tilbake til borgarkrigen som herja frå 1983 til 2005.
Store delar av Khartoum har vore kontrollert av den paramilitære gruppa RSF sidan krigen starta i 2023.
Byen er hardt råka av to år med krig. Over halvparten av innbyggjarane har flykta sidan krigen byrja, ifølgje FN.
Regjeringshæren seier dei no held fram med å fjerne RSF-styrkane heilt frå hovudstaden, skriv BBC.
– Styrkane våre har beslaglagt store mengder utstyr og våpen som tilhøyrde fienden, seier Nabil Abdallah, talsperson for regjeringshæren, på statleg TV.
Rapid Support Forces seier derimot at kampen om presidentpalasset ikkje er over, og at dei framleis held til like i nærleiken.
I ei melding på Telegram skriv RSF at dei har drepe 89 regjeringssoldatar og øydelagt fleire militære køyretøy.
Sudanske regjeringssoldatar inne i presidentpalasset i Khartoum.
Foto: - / AFP / NTBEit øydelagt pansra kjøretøy i Khartoum.
Foto: Ebrahim Hamid / AFPEin ødelagd bygning i Khartoum. Hovudstaden er blitt hardt råka av krigen.
Foto: EBRAHIM HAMID / AFP / NTB– Det er mykje som tyder på at RSF må gi opp Khartoum sjølv om vi framleis kan forvente harde kampar.
Det seier Sudan-ekspert ved Christian Michelsens Institutt (CMI), Gunnar Sørbø, til NRK.
Sørbø trur likevel ikkje at krigen nærmar seg sin slutt.
– RSF kontrollerer det aller meste av det kjempestore området vest for Nilen, seier han.
– Dei har støttespelarar i regionen. Vi kan få ei langvarig deling av landet, slik vi har sett i Jemen, Somalia og Libya.
Mange innbyggjarar skal vere positive til regjeringshæren sin framgang, ifølgje CNN.
– Dette er den beste nyheita eg har fått sidan starten av krigen, seier innbyggar Mohamed Ibrahim til Reuters.
– Vi ønskjer berre å vere trygge igjen, seier han til nyheitsbyrået.
Duaa Tariq seier til BBC at ingen mat eller medisinar har kunne blitt frakta ut av Khartoum mens kampane har halde på.
– Alle har venta på at militæret skulle ta over palasset, seier ho.
RSF har tidlegare blitt skulda for folkemord. Skuldingane har blant anna komme frå den amerikanske regjeringa.
Tusenvis av sivile skal vere drepne av RSF på bakgrunn av etnisitet, ifølgje CNN. Og eit ukjent tal kvinner skal ha blitt utsette for seksuell vald av gruppa.
Men også regjeringshæren SAF skal ha stått bak omfattande vald og overgrep mot sivile, kjem det fram i ein rapport frå FN.
To år med krig mellom den sudanske hæren og den paramilitære gruppa RSF har gjort mykje skade på hovudstaden Khartoum.
Foto: Rashed Ahmed / API heile landet har 8,8 millionar menneske blitt drivne på flukt, ifølgje FN. Dødstala er usikre, men estimerte til opp til 150 000 menneske sidan krigen starta.
Det kjem også rapportar frå WHO om hungersnaud og utbrot av sjukdommar.
Interessert i utanriks? Hør siste episode frå vår podkast her:
Publisert Oppdatert
